نهاية الفلم............. لم تكن كأى نهاية

البقاء لله......................

البقاء لله.......................

البقاء لله..........................

تم اليوم تشييع جنازة علمى رياضة ومن هنا بحب ابعت رسالة شكر لكل من وزير التربية والتعليم ورسالة شكر اخرى للاستاذ العبقرى واضع اسئلة امتحانات ا لرياضة لانهم كانوا احد الاسباب الرئيسة للوفاه.

والبقاء لله قبل امس انتحرطالبين بعد امتحان الميكانيكا.

البقاء لله فى تسريب الامتحانات.

البقاء لله فى امتحان تفاضل المدرسين مش عارفة تحله.

البقاء لله فى امتحان احصاء صعب.

البقاء لله للاهالى.

البقاء لله على ضياع مجهود الطلبه.

البقاء لله فى الثانوية العامة.

وفى نهاية احب انا اذكر عبارة شهيرة باى باى باى باى باى باى علمى رياضة وكل سنة وانتم طيبن.

معلش اخر حاجة, بعد اذنك يأحمد قول لمينا يقول لوائل يقول لمحمد يقول لفكرى يقول منى وخلى منى تقول لصفاء تقول لحنان تروح تقول للاسماء تقول لكريم يقول لبطرس يروح يقول لكرستين علشان تقول لعمرو علشان يسال سؤال

دم الطلبه الى انتحرت فى رقبة مين؟

دم الطلبة الى انتحرت فى رقبة مين.

دم الطلبه الى انتحرت فى رقبة مين.

الثانوية العامة كابوس ام حلم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مش عارف اخلى السوال الثانوية العامة ولا ثانوية العذاب ولاثانوية الضغط العصبى ولا ثانوية الحزن والبكاء ولا ثانوية الشلل والملل ولا ثانوية الفرح وتحقيق الاحلام اقولك اختار الاسم الى يريحك وقوله انت المهم عايزين نروح رحلة وندخل بداخل الثانوية العامة علشان نعرف هى حلم ولا كابوس فى البداية لو رجعنا للخلف لحد لما نوصل للصف الثالث الاعدادى ودى اول محطة فى رحلتنا تتمنى انك تدخل الثانوية العامة لانها بالنسبة ليك ممر علشان تحقق حلمك بس اقولك هيكون دة اصعب ممر فى حياتك واحتمال تلاقى فيه النور قاطع واحتمال تلاقى عمود نور واحد يكون منور واحتمال اتنين واحتمال تلاقى الممر كله منور ووقتها تقدر تدخل قال ايه كليه قمة مع أنى دلوقتى ولا فى قمة ولافى قاع كله واحد مش فارقة كتير المهم نرجع تانى للممر خالى بالك مش انت لوحدك الى فى الممر فى ناس كتير معاااااااااك ولازم كلهم يساعدوك علشان تعرف تنور الممر ياه الممر صعب للدرجة دى ايوة دة ممر موت وكمان انت لسه مش عرفت الاصعب من كدة انى الممر مستويين مش مستوى واحد وقال ايه بيقولك انى احنا عايزين نخلى الممر 3 مستويات قال ايه هى ناقصة بصراحة المفروض يزودوا عدد المستويات لانى وقتها بس عدد السكان هيقل فى مصر تلاقى الطلبه انتحرت و المستشفيات كلها ضحايا من اهالى الطلبه هو دة الممر عرفت ياعم ايه هو الممر بس هستاذنك انى اقولك حاجات كدة على السريع هل يعقل انى ساعتين امام ورقه اسئلة يحدد مصير طالب نفسى اعرف ازاى . غير كدة وكدة تلاقى قال ايه الى بيحط الامتحان فليسوف شوفت ازاى تلاقى الامتحان كله فوازير واتصال بصديق وحذف اجاينتين وتسال راى اللجنة ومفيش حد عارف يحل حاجة هو دة الامتحان . بجد تحس انى الى بيحط الامتحان واضع خطة نابليون علشان يغلب الطالب طبعا اعتذارى الشديد لنابليون لانى خطتة بتعتمد على الذكاء اما امتحانات الثانوية العامة ولا بتعتمد على الذكاء ولا على الحفظ بتعتمد على حاجة جديدة لسه مش عارفينها. ارجع تانى واسال نفسى هل يعقل انى نملة ضعيفة تغلب فيل مش عارف بصراحة ياريت لو حد عندة اجابة يبقى يرد عليا كل دة وتلاقى الاهالى واّاّاّاّاّاّه على الاهالى بتدفع فلوس فى الدروس تكفى انها تغطى ديون محافظة كل دة علشان ساعتين قدام امتحان وفى الاخر نقول ثانوية عامة وكليات قمة وكليات قاع وكليات على الشاطئ وكليات فى المحيط ايه الكلام الغريب دة . بجد الى يحصل دة حرام مش كفاية مذاكرة فى الحر ومذاكرة حشو كلام وضغط عصبى وبعد كل دة الامتحان يجى صعب نفسى اسال سوال تانى معلش الاسئلة كتير النهاردة مش احنا فى امتحان ليه الامتحان فى الثانوية العامة لازم يجى صعب انا حاسس اننا فى مصر كلمة امتحان ترجمتها فى قاموس المصريين صعب لازم الامتحان يجى صعب علشان نقدر نسميه امتحان غير كدة مش هيكون اسمه امتحان بجد انا مرة كنت ماشى قدام مدرسة ثانوى وكان نفسى يكون معايا كاميرا بجد الاهالى كانت صعبانة عليا كانت وقفة خارج المدرسة مستنظرين اولادهم وتحس من تصرفات الاهالى انى هم الى بيمتحنوا . بس تصدقوا انا فى الاخر عرفت ليه اسمها ثانوية عامة لانها بتجمع العديد من المشاعر فرح حزن سعادة بكاء زغاريد دموع صعب سهل يتحل مش يتحل تلاقيها سوق متنوع من المشاعر وفى الاخر سلملى......... على العذاب واقرف................. الثانوية العامة

دعوة للتفاؤل

مش عارف اكون متفائل ولامش ...........

حاجة غريبة عايز اعرف ايه سببها.............

طيب ايه هو الغريب .....................

انك تلاقى معظم صحابك متشائمين تمشى فى شارع تلاقى الناس متشائمة تدخل نت اخبار سودة ومقرفة وايه كمان لو فكرت تدخل مدونة ياسلام تلاقيها سودة واخبار كائيبة خلاص بقينا متشائمين بس انا مش متشائم انا متفائل جدااااااااااااااااااااااا على الرغم من ظروف اقتصادية زفت وحياة صعبة وحديد غالى ومش هنتجوز بس بردة كل دة عااااااااااااااااااااااادى انا متفائل يمكن لانى لسه مش اتخرجت وكمان لانى لسه مش واجهت ظروف الحياه الى انا عارف انها صعبة جداااااااا بس انا مقتنع بحاجة اننا احنا الشباب لازم نتحرك ونشتغل ونبنى نفسنا بايدينا مش كل حاجة نجيب العيب والكسل على غيرنا ولا على الحكومة مش كل حاجة نقول حكومة حكومة خلاص بقيت نغمة قديمة تلاقى شباب كتير تقوله ياعم قوم اشتغل يقولك قال ايه انا مستنى الوظيفة الحكومية دة كلام ياجدعان مينفعش الكلام دة ياعم قوم اشتغل اى حاجة حتى لو مش بشهادتك المهم انك تشتغل طيب اقولك حاجة بسرعة كدة بس قبل ما اقول ربنا يستر ومع مرور الوقت مش اكون انا بطل القصة دى كان فيه واحد قال ايه خريج علوم راح اشتغل شغل حكومى بشهادتة مش عجبة المرتب ترك الشغل واشتغل زبال وجمع اول مليون ودلوقتى حلم حياتة انه يعمل اكبر شركة زبالة فى مصر شفت ازاى الناس بتبنى مستقبلها مش تقولى انا هنام لحد الوظيفة لما تيجى شكلك هتنام لحد لما تخرج من الدنيا خالص وهتبقى زى ما دخلت زى ما خرجت مش قدرت تعمل اى حاجة لازم نغير نظرتنا للدنيا يلا نجرب مع بعض التفاؤل تشوف وردة بيضة جميلة تشوف عصفوة رقيقة تشوف طفل صغير بيضحك. دعوة الى التفاؤل وفى الاخر .................................سلملى على.....................التفاؤل

هل تعرف الموضه

اصبحت الموضه شئ مهم فى حياتنا اغلبية الاشياء فى حياتنا موضه تقابل شاب بيلبس حاجات غريبة تسأله يقولك موضة وناس تانية كتير بيعملوا حاجات غريبة كل دة موضه اوعى تعترض لانك لو اعترضت عليهم يقولوا عليك راجعى هى دى الموضة ربنا يستر ومش يحصل اكتر من كدة ونرجع نقول موضة. الموضه بمفهوم كتير من الشباب فى العصر الحالى اصبحت بالنسبة ليهم هى تقليد مش مهم اذا كان تقليد صح ولا غلط هيليق ولا مش هيليق المهم انا البس زاى الشاب دة علشان يقولوا ايوة الشاب دة بيلبس على الموضةز وكلها حاجات غلط انا ليا راى متواضع فى موضوع الموضة. الموضه هو انى ارتدى الملابس الى تليق عليا مش اى كلام وخلاص لازم نفكر فى الملابس الى تليق عليا ولازم افكر وانا بشترى. اغلبية الشباب دلوقتى بتلغى دماغها المهم انة يشترى حاجة زى الشاب دة علشان يكون على الموضه. وبجد نفسى حد يجاوبنى بشوف ناس كتير لبسة حظاظة وحاجات كتير فى ايدها ليه ايه السبب نفسى حد يقولى اجابة مقنعة واتحدى حد يقولك اجابة مقنعة لانى اصلا الانسان الى مرتديها علشان يقلد بس مش لاى سبب اخر وهى دى الموضه. على فكرة انا ان مش داعية اسلامى ولا شيخ انا كان نفسى من زمان اكتب فى الموضوع دة. لانى عايز الناس تفهم ايه هى الموضه ويفكروا مش يقلدوا وخلاص. للاسف اخدنا من الغرب الاشياء الخارجية ومش خدنا منهم اى حاجة فى العلم . وفى الاخر سلملى على الموضة.